“EAJren boto-emaileen erdia baino gutxiago dela erabat abertzalea” dio, eta segituan azaldu egiten du zer den berarentzat erabat abertzale izatea: “Euskal Herriaren askatasun osoaren aldekoa”. Nik baino hobeto ere jakingo du Iñakik subjektibismo ikaragarrikoak direla baiezpenok. Urrutiegi joan gabe Aldaketako Arregi, Unzalu, Muruaga, Biguri, Zubero edo Guevara berak gure herriaren askatasuna beste molde batzuen arabera ulertuko dute. Ez dut joko PPko edo PSEko zenbaitzuen jarrera muturrekora. Zenbat eta abertzaleago hainbat eta askatasun zaleago ekuazioa arriskutsua da, eta sektarioa ere bai.
“Nazionalista izatea ez baita abertzale izatea, ez eta alderantziz ere”. Funtsean bat natorkizun arren, bada non ukiturik. Bere burua modu kontzientean nazionalistatzat duena abertzalea da, hor ez dago, nire ustez, ezbairik. Ez da berdin esatea PNVko guztiak abertzaleak direla, ez baita egia. Ezagunak eta zaharrak ere badira nazionalista eta abertzale (nacionalista/patriota) terminoen arteko aldeak eta kontrakotasunak aztertu dituzten lanak Teoria hori, baina, euskal abertzaletasunaren aurka sutsu jardun izan duten —eta diharduten— apologetek (gehienbat espainolak) erabiltzen dute. Abertzale guztiak ere ez direla nazionalistak esatea ez dut hain argi ikusten, ez bada aurreko teoria onartzen dugula.
“Kultura Saila gobernuaren mahaian ez baita sail boteretsua, eraginekoa, eta EAJko beste sailburuak, bizkaitarrak batez ere, pisu politikoa dutenak, ez baitira horren euskaltzaleak eta abertzaleak”. Kultura Sailaren gaur egungo jarduna beste zirriborro batean landuko dut. Bizkaitarrak, Iñaki, ezin dira bilbotarrekin nahastatu, iruñarrak nafarrekin nahastu ezin diren modu berean. Bestalde badira oso abertzaleak izanik euskararik ez dakitenak; eta alderantziz, oso euskaltzaleak izanik, horren abertzaleak ez direnak. EAJ gehienbat bilbotar eta bizkaitarra da. Gaur egun aitortu ere egin behar da maiz, maizegi agian, teoriak praktika gailendu duela, hitzez esandakoak egitez ez direla betetzen alegia. Areago, susmoa dut EAJ une honetan gizartearen beraren atzetik ere badoala euskaltzaletasunean. Ez Bizkaikoak bakarrik, Euskal Herri osokoak ere esango nuke nik.
Boterean dagoen alderdi baten abertzaletasuna neurtzea, ordea ez da erraza. Hala ere, garai bereziak bizi ditugunez, laster ikusiko dugu nor den zer.